Imibereho y’abaturage

Ruhango- Ababyeyi bagiye gusenga bata abana mu nzu ntibagaruka

Sangiza inshuti iyi nkuru kuri:

Yanditswe na Callixte NDAGIJIMANA

Phenias Gashirabake n’ umugore we Claudine Nyirampori mu kwezi gushize bafashe imitungo irimo amasambu n’ inka barayigurisha noneho basiga abana babo batanu, umukuru muri bo ufite imyaka 14 y’ amavuko bababwira ko bagiye gusenga none ngo kugeza magingo aya ntibaragaruka.

Aba bana bavuga ko babayeho nabi bitewe n’ uko nta byo kurya bafite ku buryo ngo iyo batabonye umugiraneza ubaha ibyo guteka bajya mu buriri bakaryama.
Nyirakuru na Sekuru b’ aba bana bavuga ko bagerageza kwita kuri aba bana ariko bitewe n’ uko na bo batishoboye ngo bigera aho bikabananira.

Yaba uyu musaza n’ uyu mukecuru ndetse n’ abaturanyi b’ uyu muryango bavuga ko aba babyeyi bararuwe n’ itorero basengeramo kugeza magingo aya bataramenya inkomoko yaryo ndetse n’ uko ryitwa.
Ngo iyo bajyaga gusenga bikingiranaga mu nzu.
Bagenda bavugaga ko bagiye gutegereza Yesu uzaza kubatwara tariki ya 18 Ugushyingo uyu mwaka, umunsi warangiye hagendewe ku ngengabihe isanzwe.

Umunyamabanga Nshingwabikorwa w’ Umurenge wa Ruhango Nahayo Jean Marie ushimangira ko iki kibazo yari atarakigezwaho avuga ko aba bana bagiye guhabwa ubufasha bw’ ibiribwa bwihuse mu gihe hagishakishwa icyakorwa.

Kugeza magingo aya nta n’ umwe uhamya neza ko azi aho aba babyeyi bari, ariko hari amakuru agera kuri TV/Radio one avuga ko bo na bagenzi babo basenganaga bagera kuri 30 ndetse bashobora no kuba barenga bacumbikiwe na Polisi mu karere kamwe ko mu Ntara y’ amajyepfo.

Gusa kugeza ubwo twateguraga iyi nkuru, aya makuru Polisi yo muri iyi Ntara yari itarayemeza.
Imyitwarire y’ aba babyeyi yo guta abana mu nzu bangana gutya ishingiye ku myemerere ngo ntiyatunguye abaturanyi babo kuko ngo bari bamaze igihe kinini badahinga, ndetse ngo mu bana bagera muri 6 bafite nta n’ umwe wanditse mu gitabo cy’ irangamimerere, bikiyongeraho ko ngo badatanga umusanzu w’ ubwisungane mu kwivuza ndetse ngo n’ urwaye ntibamuvuza.

Ibitekerezo: 0

pre-moderation

Icyitonderwa, igitekerezo cyawe kiragaragara ku rubuga nyuma yo gusuzumwa n'abakozi ba TV1.

Uri nde?
Igitekerezo cyawe

Andika hano