Politiki

Tanzaniya: Abarundi ntibashimishijwe n’uko umunyarwanda agiye Kuyobora EALA

Sangiza inshuti iyi nkuru kuri:

Abadepite bahagarariye Leta y’u Burundi mu Nteko Ishinga Amategeko y’Umuryango w’Ibihugu bya Afurika y’Iburasirazuba (EALA), batangaje ko batemera ibyavuye mu matora ya Perezida wayo, kuko ngo yakozwe umubare shingiro w’inteko itora utuzuye kandi agakorwa mu buryo bunyuranije n’amategeko.

Aya matora yabaye kuwa Kabili w’iki cyumweru, tariki ya 19 Ukuboza 2017, nyuma y’uko ku wa Mbere yari yasubitswe bitewe no kuba hari abadepite bahagarariye Tanzania n’u Burundi batarasubiye mu cyumba cy’Inteko nyuma y’akaruhuko kakurikiye irahizwa ry’abagize Inteko.

Ibyavuye mu matora, byagaragaje ko Depite Martin Ngoga uhagarariye u Rwanda muri EALA, yatorewe kuba Perezida wayo ku majwi 33 naho Nzeyimana Léontine wari uhagarariye u Burundi agira amajwi atatu.

Ngoga yatowe mu cyiciro cya kabiri, kuko ubwa mbere, mu badepite 54 batoye ntihaboneka 2/3 by’amajwi y’abatoye bose bashyigikiye umukandida wabonye amajwi ya mbere; hasabwaga amajwi 36 mu gihe we yari afite 35.

Mu itangazo ryashyizwe ahagaragara rikanasinywaho n’abadepite icyenda bose bahagarariye u Burundi kuri uyu wa Gatatu, batangaje ko amategeko avuga ko Perezida wa EALA, ashyirwaho binyuze mu guhererekanya ububasha atari mu matora asanzwe nkuko byakozwe, bityo ko itubahirijwe.

Uretse ibyo, banavuga ko n’umubare usabwa kugira ngo habe amatora utubahirijwe, kuko abadepite bahagarariye u Burundi na Tanzania batari bahari, bakavuga ko nta gaciro afite ndetse ko bitareba u Burundi, bityo ko yasubirwamo.

Nubwo ariko bavuga ko amatora ataciye mu mucyo, Martin Ngoga amaze gutorwa, yahise arahirira imirimo mishya atangira no kuyobora iyi nteko asimbuye Umunya-Uganda, Daniel Fred Kidega.

Source:Igihe.com

Ibitekerezo: 0

pre-moderation

Icyitonderwa, igitekerezo cyawe kiragaragara ku rubuga nyuma yo gusuzumwa n'abakozi ba TV1.

Uri nde?
Igitekerezo cyawe

Andika hano

1X BET

Bet on your favorite team with 1xBet: Double your chances with the 100% welcome bonus and win big with our incredible ribs! Sign up and have fun: https://bit.ly/2N4DUOt

1X BET