Imyidagaduro

KNC yasubukuye umuziki mu migambi mishya no kuzamurika album yatumiye Chaka Chaka

Sangiza inshuti iyi nkuru kuri:

Kakoza Nkuriza Charles uzwi cyane nka KNC yafashe umwanzuro ntakuka wo gusubukura umuziki n’ibikorwa bishya bizatangirana no kumurika album mu birori ateganya gutumiramo Yvonne Chaka Chaka.

KNC ni umuhanzi, umunyamakuru, umwe mu bamamaza cyane, umukinnyi wa filime n’ikinamico, ayobora ibitaramo, yandika filime n’ibindi. Iyo myuga y’uruhurirane akora ayikesha impano yavukanye igashyigikirwa n’ubumenyi yavomye mu ishuri.

Mu kiganiro yagiranye n’itangazamakuru kuri uyu wa Mbere, tariki 15 Mutarama 2018, KNC yavuye imuzi imwe mu mishinga agiye kwinjirana mu muziki n’ingamba nshya nyuma y’imyaka itandatu adakora umuziki mu buryo buhoraho.

Yongeyeho ati "Nari maze imyaka ikabakaba itandatu narahagaritse, umuziki, narahagaritse gukina filime, narahagaritse gukina ikinamico, ariko ndimo kwiga ingamba. Uyu munsi rero inganzo ndumva yongeye kunkirigita kandi ndumva maze no gukura muri njye, kuko hari ukubikora ariko ukumva udafite gukura muri wowe. Ubu nzi agaciro k’umuziki, nzi n’icyo ngomba guha abantu."

Yakomeje agira ati "Ndashima Imana ko kuri ubu abahanzi bagerageza bagacuranga Live, ni urugamba twagiye turwana. Biranshimisha ko twaharuye umuhanda, abantu bamwe bakaza bakaryoherwa ariko ntabwo ari intambara yoroshye. Uyu munsi nanjye ndashaka ngo ngaruke ntayoboza ku muhanda naharuye."

Yashimangiye ko agarutse mu muziki adashyize imbere amafaranga cyane nk’uko byahoze.

Mu mishinga mishya ateganya harimo no kugura ibyuma bigezweho bizamufasha ndetse bikifashishwa n’abakora imishinga inyuranye mu muziki mu Rwanda.

Yagize ati "Uyu munsi njyewe mfite ikibazo gikomeye, umuntu arandeba ati ‘ariko uriya muntu ngaho afite ikipe mu mupira w’amaguru, araririmba, akora ibi n’ibi’. Oya ntabwo ndi mu muziki mu buryo bwo gushaka amafaranga, mbere na mbere siyo nshaka nubwo ari byiza."

Yongeyeho ati "Ndifuza kugaragaza ikindimo ntashobora no kuryama hejuru ngo nsinzire. Nubwo amafaranga nayo azaza ariko uyu munsi mbere na mbere ni ugukora icyo numva kindimo kandi nshoboye. Ndashaka guhindura isura y’umuziki w’u Rwanda kandi mu buryo bufatika."

KNC wiyemeje gusubukura umuziki yahise atanga integuza y’indirimbo nshya yise "Heart Desire" izakurikirwa n’izindi zigera kuri 16 zizasohoka kuri album nshya azamurika mu mpera za Nyakanga.

Yavuze ko kuri ubu afite indirimbo 40 yamaze gukora zizagenda zisohoka mu bihe biri imbere.

Chaka Chaka ku rutonde rw’abahanzi KNC ashobora kwifashisha mu kumurika album

KNC muri iki kiganiro yise ngishwanama n’itangazamakuru, yavuze ko mu minsi ya vuba atangira kumenyekanisha ibitaramo bibiri azamurikiramo album ya kane bizaba ku wa 27 - 28 Nyakanga 2018. Harimo icyo yageneye abifite ndetse n’icya rusange mu rwego rwo gusabana na bose.

Yavuze ko ku rutonde rw’abahanzi ateganya gutumira harimo n’Umunya-Afurika y’Epfo, Yvonne Chaka Chaka, wubatse izina muri mu ndirimbo nka "I’m Burning Up", "Thank You Mr Dj", "I Cry For Freedom", "Motherland" n’iyitwa "Umqombothi" ndetse yakoreshejwe muri filime Hotel Rwanda [ivuga mu buryo bugoramye amateka ya Jenoside yakorewe Abatutsi].

KNC yashimangiye ko ibyo bitaramo azatangira kubimenyekanisha mbere y’amezi atanu ngo bikorwe ndetse hakazashyirwaho uburyo bwo kwishyura amatike mu byiciro, ibintu bitari bimenyerewe mu Rwanda kugira ngo hazitabire benshi.

Mbere ya album ya kane KNC agiye gusohora, yakoze izindi zakanyujijeho zirimo "Mambo Sawa" yakoreye muri Uganda; "African Lady" n’iyitwa "Abagore" yaherukaga kumurika mbere yo gusubika umuziki.

Isooko: Igihe.com

Ibitekerezo: 0

pre-moderation

Icyitonderwa, igitekerezo cyawe kiragaragara ku rubuga nyuma yo gusuzumwa n'abakozi ba TV1.

Uri nde?
Igitekerezo cyawe

Andika hano