Ubukungu

Huye: Leta ya Oman igiye gufasha mu kuvugurura ahazwi nko mu Cyarabu

Sangiza inshuti iyi nkuru kuri:

Nyuma y’igihe kirenga imyaka ine Ubuyobozi bw’Akarere ka Huye bufunze inzu ziri mu Mujyi wa Huye ahazwi nko mu Cyarabu, bugasaba ba nyira zo kubaka amagorofa ajyanye n’igihe ariko ntibikorwe, kuri ubu bwamaze guha abanya-Oman ibyangombwa bitanu byo kuhubaka inzu z’ubucuruzi.

Mu 2014 nibwo ubuyobozi bw’akarere bwafunze inyubako z’ahazwi nko mu Cyarabu, ba nyirazo bakomoka muri Oman basabwa kuvugurura bakubaka izijyanye n’igihe kuko izo zari zishaje cyane.

Iki cyemezo gisa n’icyitaratanze umusaruro kuko zimwe mu nzu zafunzwe aho kubakwa bijyanye n’igihe zateje isura mbi Umujyi wa Huye, ku buryo abakunda kuwutemberamo bavuga ko zabaye ibihuru izindi zihindurwa ubwiherero.

Mu kigamiro cyihariye IGIHE yagiranye n’Umuyobozi w’Akarere ka Huye, Sebutege Ange, yavuze ko kuvugurura uyu mujyi biri mu bibahangayikishije kuko ari umushinga umaze igihe kinini, yizeza ko Leta ya Oman, igiye gutera inkunga ibikorwa byo kuwuvugurura binyuze mu bufasha izaba abaturage bafite imitungo i Huye.

Yavuze ko mu biganiro bagiranye ku wa 29 Nyakanga 2018, byatanze umusaruro kuko bemeranyije ko mu mezi atatu, abo banya-Oman bazaba bagaragaje uburyo buhamye bwo gushyira mu bikorwa ibyo biyemeje.

Yagize ati “Ni umushinga umaze igihe kinini, icyo twari twifuje na Komite Nyobozi ni ukuganira tukareba uburyo wakihutishwa. Twemeranyije ko bagiye kureba uko bashobora kutugezaho gahunda navuga ngo ni ndakuka y’uburyo baba bagiye kuwushyira mu bikorwa.”

Oman nk’igihugu gikomokamo Abarabu bacururizaga mu Cyarabu, gisanzwe ari umufatanyabikorwa w’Akarere ka Huye. Sebutege avuga ko mu biganiro bagiranye babahaye ibyangombwa bitanu byo kubaka inzu z’ubucuruzi.

Ati “Ngira ngo ejobundi badusura hari ibyemezo byo kubaka bitanu bahawe, bari babisabye mu gihe gito gishize ndetse n’ubuyobozi bw’akarere bwari bumaze gutanga uburenganzira bwo kubaka. Twabagaragarije ko kuvugurura bitinze, tubasaba ko baduha gahunda ifatika”.

Uyu muyobozi yavuze ko bumvikanye ko gahunda yo gutangira kubaka ibyo bibanza n’ibindi bijyanye no kuvugurura Umujyi wa Huye, bazayihabwa mu gihe kitarenze amezi atatu.

Uretse izo nzu z’ubucuruzi zizaba zubatse mu buryo bw’izigerekeranye, Abanya- Oman, banafite gahunda yo kubaka Umusigiti ukomeye mu Mujyi wa Huye, byose ku nkunga Leta ya Oman izatanga mu rwego rwo gufasha abaturage bayo bari muri uyu mujyi.

Kuvugurura Umujyi wa Huye, umwe muri itandatu yunganira Kigali, ntibyahwemye kuvugwa n’abayobozi b’akarere ndetse n’ab’Intara y’Amajyepfo kabarizwamo ariko ntibikorwe.

By’umwihariko, mu 2016 Guverineri w’Intara y’Amajyepfo, Mureshyankwano Marie Rose, yigeze gutanga igihe cy’ukwezi ngo inzu zishaje zizaba zasimbujwe izijyanye n’igihe, byananirana ubuyobozi bukagurira bene zo bakimuka, bukahaha abikorera bakahubaka.

Ibitekerezo: 0

pre-moderation

Icyitonderwa, igitekerezo cyawe kiragaragara ku rubuga nyuma yo gusuzumwa n'abakozi ba TV1.

Uri nde?
Igitekerezo cyawe

Andika hano

TV1 APP

Kurikira TV1 kuri Telephone yawe igendanwa:

- Usome Amakuru ashyushye kandi agezweho
- Wumve Radio 1 LIVE
- Urebe TV1 LIVE
- Utwoherereze Inkuru
- Urebe ibihumbi nibihumbi bya Video kuri VoD

downloadinga APP ya TV1 NONAHA!